1Ti 3 | GAM | STEP | Na kandja djino dje yendo ge kandja kaima paro. Ge iwa ta ye molo pillgi pai una kantau yeno dje pi dal, iwa ge kogo wopake yeno dje pro.

1 Timothy 3

Lotu kantau yenj una, singare yene mal

1 Na kandja djino dje yendo ge kandja kaima paro. Ge iwa ta ye molo pillgi pai una kantau yeno dje pi dal, iwa ge kogo wopake yeno dje pro. 2 Une singare du dje paro al moyaka, une wambo paro dje kanne ge kune nayenda. Yene game taimane moya. Yene singare kantau yenda. Singare wopake paro ge yene kantau yenda. Una pille pla ye aune. Una wone ge, une i numog woro ye wopake ye aunda. Une God kandjiye beke aunda kune yendo una moya. 3 Une nu no dall nayenda, une kumbe mul nakake, kunda nayenda, nonga nadje, ku i nano dje pille pla nayenda. 4 Yene game wombaye kantau wopake ye molo kandja djindaka yene wombaye wopake pille yene. 5 Une game wombaye kantau wopake nayei dal, une God unakye kantau namba mal yenda? 6 Une ge Jisas boll pillgi dji una kindja namoya. Moi dal, na iwa kerman moro we dje pi dal, God Satan toi mal embe tonda. 7 Una pillgi naparo una nalene al une kandjiye wopake panda. Man panda, yene kandjiye dje ke yeneke, Satan kuwo kolo wori paro tonda.

Lotu kogo yenj una singare wopake yene

8 Kantau yenj una singare wopake yene mal, lotu kogo una embe yene. Una kane nomane wopake aune. Lotu kogo una djillakne soka napanda. Nu dongall merke nanane. Una djell kuine ne, wal ngundjo i nanane. 9 Pillgi me God i pene wori ge amblo gi dje molo God nale al na kogo pai mal yendo dje kanda. 10 Asamoll ye su ye kanne. Ga wambo napai dal, lotu kogo una moye.

11 Kogo una yene mal embe, gamane kambono para kandjine wopake panda moye, una kandjine mopine nabiye, yenekne singare kantau wopake ye pagle, kogo porapora ine al ge kaima panda mal ye moye.

12 Lotu kogo iwa ta moya ge, une game taimane moya. Yene game wombaye kantau wopake yenda. 13 Kogo wopake yei dal, una nalene al une kandjiye ge wopake panda. Alla yene Krais Jisas pillgi djinda mal ge une kand nagoya, dje pene worda.

14 Na ola dje wo ni kanno dje pro ba ni kogo yemben mal na ipon pepa bolo ni aundo. 15 Embe pille, na ola dje nawoll dal, God unakye singare yene mal ni pille kane yemben. Nono God unakye mormon ge, nono God gun moro una yene Sios mormon. Nono numb poka dongall molo kandja kaima paro ge amblo gi dje mormon. 16 God singare yendo mal ge, er pene woi, wal kerman ke paro. Nono kane kune yenmon ge embe.

Une ge, una wombe kaima molo woi, una kani.
Wo singare du dje kaima yei ge, God Murble ombine dje awi, tau agelo kambono kani.
Yene kandjiyembe pai ge, una po epil djell una dje awi pi.
Wo moi ge, makimb al una pillgi dji.
Alla God i pla worika, une kandjiye kerman pai moro.